یزید بن معاویہ پر الزامات کا تحقیقی جائزہ - کتاب ڈاؤن لوڈ

اس کتاب ’’ یزیدبن معاویہ پر الزامات کا تحقیقی جائزہ‘‘ میں روایات کے قبول ورد کے لئے اصول حدیث کا ضابطہ اپنایاگیا ہے اورامیریزید کے دفاع میں انہیں روایات کو ذکر کیا گیا ہے جو باسند ہوں اوراصول حدیث کے معیارپر صحیح یاحسن درجے تک پہنچتی ہوں، بعض ضعیف تاریخی روایات جن کے مفہوم کی تائید دیگر صحیح روایات سے ہوتی ہے انہیں بھی اس کتاب میں بطور استدلال ذکر نہیں کیا گیاہے۔ بلکہ ان کی طرف اشارہ پراکتفاء کیاگیا، یاوضاحة ذکرکیا گیاتو اس کا درجہ بھی واضح کردیا گیا ہے، اوراس طرح کے بعض مقامات پر تفصیل کے لئے ہماری دوسری کتاب ''حادثہ کربلا اورسبائی سازش''کا حوالہ دیاگیاہے۔دوسری طرف امیریزید کی مذمت میں ملنے والی روایات کی حقیقت کو پوری تفصیل اور دلائل کے ساتھ واضح کیا گیا ہے یہ امتیاز اس موضوع پر لکھی گئی شاید ہی کسی اورکتاب میں قارئین کو نظرآئے۔
واضح رہے کہ ہماراموضوع الزامات پربات کرنا ہے اس لئے اس باب میں تاریخی روایات میں تساہل درست نہیں ہے بلکہ ایسے معاملات میں تو حدیث سے زیادہ تاریخی روایات میں چھان بین کی ضرورت ہے۔

امیرالمؤمنین فی الجرح والتعدیل ، فقیہ اسماء الرجال ، علامہ معلمی رحمہ اللہ(المتوفی1386) فرماتے ہیں:
أن حاجة التاريخ إلى معرفة أحوال ناقلي الوقائع التاريخية ، أشد من حاجة الحديث إلى ذلك ؛ فإن الكذب والتساهل في التاريخ أكثر
تاریخ کو حدیث سے کہیں زیادہ اس بات کی ضرورت ہے کہ تاریخی واقعات نقل کرنے والے راویوں کی معرفت حاصل کی جائے کیونکہ جھوٹ اورتساہل کا وجود تاریخ میں بہت زیادہ ہے۔[علم الرجال وأهميته للمعلمی ص: 257]

بعض احباب کے مشورہ پر کتاب کے اخیر میں ہماری دوسری کتاب ''حادثہ کربلا اور سبائی سازش '' سے حادثہ کربلا کی روداد کو بطورضمیمہ شائع کردیا گیاہے یہ حصہ اس اصل کتاب میں شامل نہیں ہے اس حصہ میں روایات کے قبول ورد میں جو منہج اپنایا گیا ہے وہ اسی حصہ کے شروع میں درج ہے۔
یزید کے خلاف جوباتیں پیش کی جاتی ہیں ہماری نظر میں ان کی دس قسمیں بنتی ہیں، امیر یزید کے خلاف ہربات کا تعلق انہیں دس قسموں میں سے کسی نہ کسی ایک سے ہوتاہے۔ہم نے ہرقسم کو ایک باب کی شکل دی ہے اوراس سے تعلق رکھنے والی تمام باتوں کو اسی باب کے تحت جمع کرکے اس کا مفصل جائزہ پیش کیا ہے۔

دس (10) ابواب پر مشتمل اور نو سو (900) صفحات پر پھیلی ہوئی یہ کتاب معروف عالم دین فضلیۃ الشیخ حافظ صلاح الدین یوسف حفظہ اللہ کی تقریظ کے ساتھ طبع ہوئی ہے۔ شیخ حفظہ اللہ کے بقول اس کتاب سے قبل اس موضوع پر اردو میں اتنی تفصیلی کتاب شاید نہیں ہے۔
کتاب کو پی ڈی ایف شکل میں، نیچے دئے گئے لنک سے ڈاؤنلوڈ کریں

ڈاؤنلوڈ لنک